الشكلمة الصيامى اللى احلى من الفطارى

المقادير:
كوب سكر
نص كوب لبن نباتى أو كريمر انا استعملت لبن جوز هند
2 ملعقة كبيرة عسل اسود و يكون ملزق جدا و ميكونش صايص (تكونى مطلعاه من الثلاجة)
2 ملعقة شاى فانيليا (ملقتهاش)
رشة ملح
3 كوب جوز هند (ايوة تلاتة و حطيهم منغير لماضة ولا فزلكة)
3\4 كوب دقيق (فعلا)
الطريقة:
هنولع الفرن على حرارة 160 و نسيبه
نحضر صينية و ندهنها زيت و نحط فيها ورقة تصوير A4 ههههه أو ورق زبدة
نحضر الآله اللى بتعمل كور الأيس كريم لو عندنا
هنحط المكونات على بعض بالترتيب اللى فوق و نعجن كويس جدا لغاية ما نعمل كرة و نلقيها مسكت ف بعض
نجرب عينة يعنى نعمل بايدينا او بمعلقة الأيس كريم 4 او 5 كور و نحطهم ف الصينية و نزجها فى الفرن 10 دقايق و نشوف لو لقيناها طرية هنزود الدقيق لو لقينها مفرولة هنزود ماية....
ملحوظة: هى بتطلع طرية شوية بس ماسكة روحها و بتنشف بعد ما تبرد